మనందరికీ ఎన్నెన్నో నచ్చిన పాటలు ఉంటాయి. కొన్ని పాటల్లో సంగీతం మదిని మెరిపిస్తే.. మరి కొన్ని పాటల్లో సాహిత్యం మురిపిస్తుంది.. మరి కొన్నీటిలో గాయకుల గాత్రం మైమరిపిస్తుంది. ఏదయితేనేం.. ఆయా పాటలు మాత్రం మన మనసుని ఆహ్లాదపరుస్తాయన్నది మాత్రం వాస్తవం. మన సినిమాల్లో అడపా దడపా మంచి మంచి పాటలు వచ్చి మనల్ని అలరిస్తూ ఉంటాయి. ఎన్నెన్నో వచ్చి వెళ్తుంటాయి కాబట్టి.. కాలగమనంలో కొన్ని మరచిపోతుంటాం. ఎక్కడో అనుకోకుండా ఆ పాట వినపడగానే.. పాటతో పాటుగా ఆ పాటలు ఇదివరకు విన్నప్పటి గత స్మృతులు.. దాన్ని అల్లుకున్న భావాలెన్నో మనని ముప్పిరిగొంటాయి. అలా అనుకోకుండా ఒక చక్కని పాట గుర్తొస్తే భలే సంతోషంగా అనిపిస్తుంది. ఆ ఉద్దేశ్యంతోనే.. నా బ్లాగులో అప్పుడప్పుడూ కొన్ని పాటల్ని గుర్తు చేస్తూ ఉంటాను.
కొన్ని అద్భుతమైన పాటలు ఒకోసారి ప్రజాదరణకు నోచుకోవు. సినిమా ఫ్లాప్ అవ్వడమో లేక మరింకేదో కారణాల వాళ్ళో ఆ పాటలు ఎక్కువ మంది దరి జేరవు. ఉదాహరణకి ఇప్పుడు నేను చెప్పే ఈ 'ఎవరో ఒకరు ఎపుడో అపుడు' అనే ఈ పాట 1992 లో వచ్చిన రేవతి నటించిన 'అంకురం' అనే సినిమాలోనిది. ఈ పాట తెలిసిన వారందరూ అద్భుతమనే అంటారు. కానీ.. తెలియని వారు కూడా చాలామందే ఉన్నారన్నది నిజం. విచిత్రం ఏంటంటే.. ఈ పాట పల్లవి తెలిసిన చాలామందికి పాట మొత్తం తెలీదు. మరి కొంతమందేమో ఈ పాట ఉందని తెలుసు గానీ పెద్దగా వినలేదు అంటారు. నిజమేనోయ్.. ఈ పాట చాలా బావుంటుంది. కానీ.. ఈ మధ్య విననే లేదు అనే వారు మరి కొందరు.
సరే లెండి.. తెలిసి ఉన్నా.. తెలీకపోయినా.. మనందరం గుర్తు చేసుకోదగ్గ అద్భుతమైన పాట ఇది. సంగీత దర్శకుడు 'హంసలేఖ' స్వరపరచిన ఈ పాటని చిత్ర, బాలు ఆలపించారు. ఎన్నెన్నో ఆణిముత్యాల్లాంటి పాటల్ని రాసిన సిరివెన్నెల గారి కలం నుంచి జాలువారింది ఈ పాట. మనిషిలో పట్టుదలను, స్ఫూర్తిని రగిలించేలా భావం ఉన్నా పాటలు ఎన్నో ఉన్నాయి మన తెలుగులో. కానీ.. ఈ పాటలో సిరివెన్నెల గారి ప్రయోగాలు ఎంతో అబ్బురపరుస్తాయి. తొలివేకువ కూత కూసే కోడిని, నిశీధిలో తిరుగాడే మిణుగురు పురుగులనూ, ఎండ వేడికి ఒళ్ళు మండి ఆవిరయ్యే సముద్రాన్ని.. ఇలా ప్రకృతిలో ఉన్న వాటన్నిటినీ చూసి మనం స్ఫూర్తిని పొందాలని సిరివెన్నెల గారు చెప్పిన మాటలు పాట విన్న వారి మదిలో ఎప్పటికీ నిలిచిపోతాయని నా అభిప్రాయం. అంతెందుకు అసలా పల్లవి చూడండి.. ఎవరన్నా ఏదైనా పనికి తొలి అడుగు వెయ్యాలా వద్దా అన్న సంశయంలో ఉంటే "ఎవరో ఒకరు ఎపుడో అపుడు నడవరా ముందుకు.. అటో ఇటో ఎటోవైపు.." ఈ వాక్యాలు వింటే.. ఖచ్చితంగా ముందడుగు వేసి తీరుతారు. ఏదైనా క్రొత్త బాటలో నడవాలన్న తలంపు వచ్చినవారికి ఈ రెండు మాటలు చెప్తే మది ఆత్మవిశ్వాసంతో నిండిపోతుంది. కాదంటారా.? "మొదటి వాడు ఎప్పుడూ ఒక్కడే మరి.. మొదటి అడుగు ఎప్పుడూ ఒంటరే మరి.. వెనుక వచ్చువాళ్ళకు బాట అయినది.."
సరే మరి.. నా వంతు అయిపొయింది. ఇంక ఇప్పుడు పాట సాహిత్యం చూసి, పాట విని అభిప్రాయం చెప్పే వంతు మీది :)
పాట వినడం కోసం బ్లాగు పైన ఎడమ వైపున ఉన్నా విడ్జెట్ చూడండి. ఈ పాట download చేసుకోవాలంటే ఇక్కడ చూడండి.
ఎవరో ఒకరు.. ఎపుడో అపుడు..
ఎవరో ఒకరు.. ఎపుడో అపుడు..
నడవరా ముందుగా.. అటో ఇటో ఎటో వైపు..
అటో ఇటో ఎటో వైపు..!
మొదటి వాడు ఎప్పుడూ ఒక్కడే మరి..
మొదటి అడుగు ఎప్పుడూ ఒంటరే మరి..
వెనుక వచ్చువాళ్ళకు బాట అయినది..!
ఎవరో ఒకరు.. ఎపుడో అపుడు..
నడవరా ముందుగా.. అటో ఇటో ఎటో వైపు..
అటో ఇటో ఎటో వైపు..!
కదలరు ఎవ్వరూ వేకువ వచ్చినా..
అనుకొని కోడి కూత నిదరపోదుగా ..
జగతికి మేలుకొలుపు మానుకోదుగా ..
మొదటి చినుకు సూటికా దూకి రానిదే..
మబ్బు కొంగు చాటుగా ఒదిగి దాగితే ..
వాన ధార రాదుగా నేల దారికి..
ప్రాణమంటూ లేదుగా బ్రతకటానికి ..
ఎవరో ఒకరు.. ఎపుడో అపుడు..
నడవరా ముందుగా.. అటో ఇటో ఎటో వైపు..
అటో ఇటో ఎటో వైపు..!
చెదరక పోదుగా చిక్కని చీకటి..
మిణుగురు రెక్క చాటు చిన్ని కాంతికి ..
దానికి లెక్క లేదు కాళరాతిరి..
పెదవి ప్రమిద నిలపనీ నవ్వు జ్యోతిని..
రెప్ప వెనక ఆపనీ కంటి నీటిని..
సాగలేక ఆగితే దారి తరుగునా..?
జాలి చూపి తీరమే దరికి చేరునా..?
ఎవరో ఒకరు.. ఎపుడో అపుడు..
నడవరా ముందుగా.. అటో ఇటో ఎటో వైపు..
అటో ఇటో ఎటో వైపు..!
యుగములు సాగినా నింగిని తాకక..
ఎగసిన అలల ఆశ అలసిపోదుగా..
ఓటమి ఒప్పుకుంటూ ఆగిపోదుగా..
ఎంత వేడి ఎండతో ఒళ్ళు మండితే..
అంత వాడి ఆవిరై వెళ్లి చేరదా..?
అంత గొప్ప సూర్యుడు కళ్లు మూయడా..?
నల్ల మబ్బు కమ్మితే చల్లబారడా..?
ఎవరో ఒకరు.. ఎపుడో అపుడు..
నడవరా ముందుగా.. అటో ఇటో ఎటో వైపు..
అటో ఇటో ఎటో వైపు.
No comments:
Post a Comment